Exodus 28

Izambatho zobuphristi

1“Akulethwe kuwe phakathi kwabako-Israyeli umfowenu u-Aroni kanye lamadodana akhe u-Nadabi, lo-Abhihu, u-Eliyazari lo-Ithamari, ubahlukanisele ukuba babe ngabaphristi bami. 2Umenzele u-Aroni umfowenu izambatho ezingcwele, ezizamenza abe lesithunzi abukeke. 3Atshele wonke amadoda azingcitshi lalenhlakanipho maqondana lalo umsebenzi ukuthi benzele u-Aroni izambatho zokwahlukanisela umsebenzi wami wokuba ngumphristi. 4Yilezi izambatho abazazenza: isambatho sesifubeni, isambatho semahlombe, isigqoko, ibhatshi elelukiweyo, iqhiye kanye lebhanti. Kabamenzele u-Aroni umfowenu lamadodana akhe izambatho lezi ezingcwele ukuze babe ngabaphristi bami.

5Kabasebenzise intambo eziluhlaza, leziyibubende lezibomvu, kanye lelembu elicolekileyo.

Isambatho semahlombe

6“Uzakwenza isambatho semahlombe ngelembu elelukwe kuhle ngentambo eziligolide, leziluhlaza, leziyibubende kanye lezibomvu – kube ngumsebenzi womuntu oleminwe. 7Kumele sibe leziqa zemahlombe ezimbili zithungelwe emaceleni aso womabili ukuze sihlanganiswe. 8Kuzakuthi ibhanti laso lasekhalweni elelukwe ngobungcitshi lenziwe lifanane laso – libe ntonye lesambatho semahlombe lenziwe ngelembu elelukwe kuhle ngentambo eziligolide, leziluhlaza, leziyibubende kanye lezibomvu.

9“Thatha amatshe amabili ohlobo lweonekisi udwebele kuwo njengombazi wamatshe aligugu amabizo amadodana ka-Israyeli 10ngokulandelana kwawo – ayisithupha kwelinye ilitshe kuthi aseleyo uwadwebele kwelinye njalo.

11Dwebela amabizo amadodana ka-Israyeli ematsheni womabili njengombazi wamatshe aligugu edwebela uphawu. Ubusuwazingelezela ngeziceciso zegolide 12ozalithungela eziqeni zamahlombe kube ngamatshe esikhumbuzo samadodana ka-Israyeli. U-Aroni kumele athwale amabizo emahlombe akhe kube yisikhumbuzo phambi kukaJehova. 13Yenza iziceciso zegolide 14kanye lamaketane enziwe ngegolide elicengekileyo alukelwe ndawonye njengegoda uwabophele ezicecisweni zegolide.

Isambatho sesifubeni

15“Uzakwenza isambatho sesifuba esokwahlulela – senziwe ngumuntu oleminwe. Usenze njengesambatho semahlombe: ngelembu elelukwe kuhle ngentambo eligolide, leluhlaza, leyibubende kanye lebomvu.

16Sifanele silingane nxazonke – isandla ubude lesandla ububanzi – sigoqwe saphindwa.

17Ubusuthungela kuso imizila emine yamatshe aligugu. Emzileni wakuqala kuzakuba lerubhi, lethophezi kanye lebheriyeli, 18emzileni wesibili kube yi-emaralidi, isafaya, ledayimana,

19emzileni wesithathu ijasinti, i-agathi kanye le amethisi, 20emzileni wesine ikhirisolathi, ionekisi kanye lejaspa. Athungele ezicecisweni zegolide. 21Kakube lamatshe alitshumi lambili, lilinye limele ibizo lamadodana ka Israyeli, linye ngalinye lilotshwe njengokudweba kombazi wamatshe, kungani luphawu, kulotshwe kulelo lalelo ibizo lezizwana zako-Israyeli ezilitshumi lambili.

22“Isambatho sesifubeni selukwe ngamaketane egolide elicolekileyo kungani ligoda. 23Yenza amasongo egolide amabili ube usuwabophela emagumbini amabili awesambatho sesifubeni. 24Bophela amaketani amabili egolide emasongweni asemagumbini esambatho sesifubeni, 25kuthi ngapha acina khona abotshelwe phambili kusambatho semahlombe. 26Yenza amasongo amabili egolide uwabophele emagumbini amabili awesambatho sesifubeni ngaphakathi komphetho phansi kwesambatho semahlombe.

27Yenza amanye amasongo egolide amabili ubusuwabophela ngaphansi kweziqa zemahlombe phambi kwesambatho semahlombe, eduze komphetho ngaphezudlwana kwebhanti lasekhalweni lwesambatho semahlombe. 28Amasongo esambatho sesifubeni azabotshaniswa lamasongo esambatho semahlombe ngentambo eluhlaza, kusihlanganisa lebhanti lasokhalweni, ukwenzela ukuthi isambatho sesifubeni singatsheleli sehlukane lesambatho semahlombe.

29“Kuzakuthi lapho u-Aroni engena Endaweni Engcwele, agqize phezu kwenhliziyo yakhe isambatho sesifubeni sokwahlulela esilamabizo amadodana ka-Israyeli kube yisikhumbuzo esiqhubekayo phambi kukaJehova. 30Faka njalo i-Urimi kanye leThumimi esambathweni sesifubeni, ukuze ziqondane laphezu kwenhliziyo ka-Aroni loba kunini engena phambi kukaJehova. Ngalokho u-Aroni uzabe ethwele amandla okuquma izinqumo kwabako-Israyeli phezu kwenhliziyo yakhe phambi kukaJehova.

Ezinye izambatho zabaphristi

31“Yenza isigqoko sesambatho semahlombe ngelembu eliluhlaza kuphela, 32kube lesikhala sokungenisa ikhanda phakathi laphakathi. Kuzakuba lomphetho onjengebheqe othungwe walandelisela isikhala lesi ukuze isambatho singadabuki. 33Wenze emphethweni wesambatho amaphomegranethi ngentambo eziluhlaza, leziyibubende kanye lezibomvu, uwugabanise lamabhera egolide. 34Amabhera egolide kumele agabane lamaphomegranethi emphethweni wesigqoko. 35“U-Aroni kufanele asambathe nxa esenza umsebenzi wokukhonza. Umsindo wamabhera uzwakala lapho engena eNdaweni eNgcwele phambi kukaJehova lalapho ephuma, ukuze angafi.

36“Yenza umcephe wegolide elicengekileyo udwebe uloba kuwo njengombazi wamatshe udwebela uphawu: UBUNGCWELE ABUBE KUJEHOVA. 37Uwubophele eqhiyeni ngentambo eluhlaza ube phambi kweqhiye. 38Uzakuba sebunzini lika-Aroni ukuze athwale amacala aqondene lezipho ezingcwele ezinikelwa ngabako-Israyeli, kungakhathalekile ukuthi yisipho bani. Umcephe uzakuba sebunzini lika-Aroni kokuphela ukuze abako-Israyeli bemukeleke kuJehova.

39“Yeluka ibhatshi lelembu elicolekileyo kanye leqhiye yelineni elihle. Kuzakuthi ibhanti lenziwe ngumaluki. 40Wenzele amadodana ka-Aroni amabhatshi, lamabhanti kanye lamaqhiye ukuze abe lesithunzi abukeke. 41Emva kokugqokisa u-Aroni umfowenu kanye lamadodana akhe lezizambatho, bagcobe ubahlukanisele ukuba ngabaphristi bami.

42“Thunga izambatho zangaphansi ngelembu, zisukele ekhalweni kusiya emathangazini, zibe yizambathiso zomzimba.

43U-Aroni kanye lamadodana akhe bazazigqoka izikhathi zonke nxa bengena eThenteni lokuHlanganela lanxa besondela e-alithareni ukwenza umsebenzi wokukhonza eNdaweni eNgcwele, ukuze bangabi lecala bafe. “Lokhu kuzakuba yisimiso esingapheliyo ku-Aroni lakuzizukulwane zakhe.